Habari, Matangazo, na Simulizi za Huduma

Kanisa la Tanzania Assemblies of God (TAG) limempata kiongozi mpya wa Jimbo la Ludewa kufuatia uteuzi rasmi wa Mchungaji na Mwinjilisti Rev. Steven Msongole kuwa Askofu wa jimbo hilo.

Uteuzi huo umepokelewa kwa furaha na shangwe kubwa kutoka kwa waumini wa TAG Jordan Revival Christian Centre (JRCC) Mkondachi, pamoja na jamii pana ya waumini wa TAG ndani na nje ya Ludewa.

Akizungumza kwa niaba ya waumini, baadhi ya viongozi na watoto wa kiroho walieleza kuwa wanamshukuru Mungu kwa uongozi wa mtumishi huyo, wakisisitiza kuwa amekuwa mfano wa uaminifu, bidii, na kujitoa katika kazi ya Mungu kwa muda mrefu.

“Tunamuombea Askofu wetu awe na hekima, nguvu, na ujasiri katika kuliongoza jimbo hili. Tunaamini kupitia yeye, Mungu ataleta uamsho mkubwa zaidi,”
walisema baadhi ya waumini.

Mbali na nafasi yake mpya, Rev. Steven Msongole anaendelea kuhudumu kama Mchungaji Kiongozi wa TAG JRCC Mkondachi, ambapo huduma yake imekuwa na matokeo makubwa ya kiroho na kijamii.

Uteuzi huu unaashiria hatua mpya ya ukuaji wa kanisa katika Jimbo la Ludewa, huku matarajio makubwa yakiwa katika kuimarika kwa huduma za injili, uinjilisti, na kuleta uamsho wa kiroho kwa watu wengi zaidi.

Kanisa linaendelea kusisitiza umuhimu wa maombi na ushirikiano kutoka kwa waumini wote ili kuhakikisha kuwa uongozi huu mpya unaleta matunda mema kwa utukufu wa Mungu